Փետրվարի 23-ին Ժնևում տեղի ունեցավ Հայաստանի Հանրապետության արտաքին գործերի նախարար Արարատ Միրզոյանի և Շվեյցարիայի Համադաշնության արտաքին հարաբերությունների դաշնային դեպարտամենտի ղեկավար Իգնասիո Կասիսի միջև հանդիպում։
Հանդիպման ընթացքում քննարկվել են երկու երկրների միջև գործընկերության զարգացման հնարավորությունները։ Զրուցակիցները համաձայնել են աշխատել երկկողմ օրակարգը բովանդակային նոր ուղղություններով հարստացնելու համար։
Հայաստանի ԱԳ նախարարը տեղեկացրել է, որ ՀՀ կառավարությունը որոշում է կայացրել Բեռնում հիմնել Հայաստանի Հանրապետության ռեզիդենտ դեսպանություն։ Այս քայլը շվեյցարական կողմից ընդունվել է երկուստեք գոհունակությամբ՝ որպես երկկողմ համագործակցության ավելի սերտ դարձնելու նոր խթան։
Հանդիպման ընթացքում քննարկվել են նաև ԵԱՀԿ շրջանակներում փոխգործակցության հարցերը, այդ թվում՝ Շվեյցարիայի նախագահության պայմաններում։ Զրուցակիցները անդրադարձել են այլ ձևաչափերում փոխշահավետ ներգրավվածության հնարավորություններին և առաջիկա բարձրաստիճան միջոցառումներին, որոնցից մեկը Երևանում կայանալիք Եվրոպական քաղաքական համայնքի հանդիպումն է։
Արարատ Միրզոյանը և Իգնասիո Կասիսը մտքեր են փոխանակել նաև տարածաշրջանային գործընթացների շուրջ։ Ընդգծվել է Հայաստանի և Ադրբեջանի միջև հաստատված խաղաղության և դրա ամրապնդմանն ուղղված հետևողական քայլերի կարևորությունը։
Հանդիպման ավարտին անդրադարձ է կատարվել նաև հումանիտար բնույթի հարցերին, մասնավորապես՝ Ղարաբաղից տեղահանված փախստականների կարիքների հասցեագրմանն ուղղված ծրագրերին։
