Այսօր կայացել է ՀՀ կառավարության փոխվարչապետ Մհեր Գրիգորյանի և Հայաստանում ԵՄ Պատվիրակության ղեկավար, դեսպան Վասիլիս Մարագոսի միջև հանդիպում։
Հանդիպման ընթացքում փոխվարչապետը նշել է, որ Հայաստանը հույս ունի, որ Եվրոպական քաղաքական համայնքի և Հայաստան-ԵՄ գագաթնաժողովները կամրապնդեն կողմերի մտադրությունը շարունակելու համագործակցությունը։ Նրա խոսքով՝ այս գործընկերությունը ուղղված է Հայաստանի ինտեգրմանը եվրոպական տրանսպորտային, էներգետիկ և թվայնացման ցանցերին։ Այս ինտեգրումը, փոխվարչապետի կարծիքով, կնպաստի ոչ միայն Հայաստանի կայուն զարգացմանը, այլև ամբողջ տարածաշրջանի խաղաղությանը։
Զրուցակիցները քննարկել են նաև ժողովրդավարական և տնտեսական դիմակայունության ամրապնդման և փոխկապակցվածության հարցերը։ Նրանք կարևորել են ռազմավարական առաջնայնություն հանդիսացող ծրագրերում ներդրումներ կատարելու հնարավորությունները՝ ինչպես հայաստանյան, այնպես էլ ԵՄ մասնավոր հատվածների կողմից։ Այս քննարկումը տեղի է ունեցել Երևանում մայիսին կայանալիք բարձր մակարդակի միջոցառումներին ընդառաջ։
