Հունաստանի ազգային պաշտպանության նախարար Նիկոս Դենդիասը հարգանքի տուրք է մատուցել Օսմանյան կայսրությունում Հայոց ցեղասպանության զոհերի հիշատակին՝ նշելով այս ողբերգության 111-րդ տարելիցը։
Նախարարը նշել է, որ այս հիշատակությունը հելլենիզմի համար ոչ միայն «տարելից» է, այլև մշտական հիշեցում այն մասին, որ պատմական ճշմարտության ճանաչումն անհրաժեշտ պայման է մարդկության դեմ հանցագործությունների կրկնությունը կանխելու համար։
«Այսօր մենք հարգում ենք 20-րդ դարի մարդկության դեմ ամենահրեշավոր հանցագործություններից մեկի՝ Հայոց ցեղասպանության զոհերի հիշատակը։ Հայաստանի բարեկամ ժողովրդի հետ հետապնդումների և ողբերգությունների պատմական փորձը կիսող հելլենիզմի համար հիշատակի միջոցառումները սոսկ «տարելից» չեն։ Սա մշտական հիշեցում է այն մասին, որ ողջ միջազգային հանրության կողմից պատմական ճշմարտության ճանաչումն անհրաժեշտ պայման է, որպեսզի մարդկության դեմ հանցագործությունները չկրկնվեն։ Այլևս երբեք», – գրել է Նիկոս Դենդիասը՝ իր սոցիալական ցանցերում հրապարակելով Երևանում Հայոց ցեղասպանության զոհերի հուշահամալիր կատարած այցի լուսանկարը։
Հիշեցնենք, որ Օսմանյան կայսրությունում Հայոց ցեղասպանությունը 20-րդ դարի առաջին ցեղասպանությունն էր։ 1915 թվականի ապրիլի 24-ին Օսմանյան կայսրության մայրաքաղաք Կոստանդնուպոլսում սկիզբ դրվեց կայսրության հայ հպատակների ոչնչացմանը, որը սկսվեց հայ մտավորականների ձերբակալություններով, իսկ հետո վերածվեց հայերի լիակատար բնաջնջման։ Թուրքական իշխանությունների այս գործողությունների արդյունքում ավելի քան 1,5 միլիոն հայեր տեղահանվեցին, սովից ու խոշտանգումներից մահացան։
Հայոց ցեղասպանությունը ճանաչել են աշխարհի բազմաթիվ երկրներ և միջազգային կազմակերպություններ, այդ թվում՝ Եվրոպայի խորհուրդը, Եվրախորհրդարանը, ՄԱԿ-ի խտրականության կանխարգելման ենթահանձնաժողովը, Եկեղեցիների համաշխարհային խորհուրդը և այլն։ Առաջինը հայերի զանգվածային սպանությունները պաշտոնապես ճանաչել և դատապարտել է Ուրուգվայի խորհրդարանը (1965)։
Ամեն տարի Հայաստանում և Սփյուռքում անցկացվում են Հայոց ցեղասպանության զոհերի հիշատակին նվիրված միջոցառումներ։
