«Բարգավաճ Հայաստան» կուսակցության մամուլի քարտուղար Իվետա Տոնոյանը հայտարարեց, որ կուսակցության փաստաբանական թիմը պատրաստում է դատական հայց Հայաստանի հանրային հեռուստաընկերության (ՀՀՀ) դեմ։ Հայցը կառաջարկվի զրպարտության տարածման և կուսակցության առաջնորդ Գագիկ Ծառուկյանի հասցեին վիրավորական արտահայտություններ հնչեցնելու կապակցությամբ։
Այս մասին Տոնոյանը հայտարարեց մայիսի 25-ին Երևանում կայացած մամուլի ասուլիսում։ Նրա խոսքով՝ ՀՀՀ-ն օրեր առաջ հրապարակել էր տեսանյութ, որում Ծառուկյանի և նրա ընտանիքի անդամների հասցեին հնչում էին անթույլատրելի բառապաշար և վիրավորական արտահայտություններ։
«Ափսոսանք է հարուցում, որ հարկատուների հաշվին աշխատող ՀՀՀ-ն նման բան է թույլ տալիս։ Մեր փաստաբանական թիմը դատական հայց է պատրաստում զրպարտության տարածման առնչությամբ։ Մեզ համար նման պահվածքն անընդունելի է», – ընդգծեց Տոնոյանը՝ նշելով, որ քաղաքական պայքարի պայմաններում կարող են հնչել քննադատական գնահատականներ, սակայն դրանք չպետք է անցնեն բարոյական սահմանները։
Մամուլի խոսնակը նաև անդրադարձավ այն իրավիճակին, երբ, նրա խոսքով, պետական և վարչական ողջ ռեսուրսն ուղղված է բացառապես մեկ նպատակի՝ քաղաքական ընդդիմախոսներին լռեցնելու։ Նա նշեց, որ այս գործընթացների շրջանակում տարբեր քրեական գործեր են հարուցվում։
«Այս պահին գործ է հարուցվել մեր ընտրական ցուցակի երկրորդ համար Անդրանիկ Թևանյանի դեմ», – ասաց Տոնոյանը՝ հավելելով, որ իրենց փաստաբանները համարում են այդ գործը անհիմն և մտադիր են բողոքարկել Թևանյանին կալանավորելու որոշումը։ Նա նաև նշեց, որ շարունակվում են գործընթացները Մարտուն Գրիգորյանի նկատմամբ ՀՀ հակակոռուպցիոն կոմիտեի հարուցած գործի հետ կապված։
Այս կապակցությամբ Տոնոյանը հարց ուղղեց Հակակոռուպցիոն կոմիտեին․ «Ինչու՞ նույն կերպ չի դիտարկվում իշխանության կողմից վարչական ռեսուրսի օգտագործումը նախընտրական քարոզչության ժամանակահատվածում։ Ու՞ր է նայում Հակակոռուպցիոն կոմիտեն։ Թող գոնե մեկ գործ հարուցվի իշխանության ներկայացուցիչների, մասնավորապես, Փաշինյանի դեմ։ Ընտրություններից առաջ բարձրացվել են թոշակները, պետական ծառայողներին վճարվել են պարգևավճարներ, տեղի է ունեցել պաշտոնների բաշխում»։
Չնայած ճնշումներին, սպառնալիքներին և քրեական գործերի հարուցմանը, «Բարգավաճ Հայաստան» կուսակցությունը շարունակելու է կառուցողական գործելաոճը և մտադիր չէ շեղվել ընտրված ուղուց։ «Փաշինյանը գնաց վախի և թշնամանքի մթնոլորտ ձևավորելու ճանապարհով։ Սակայն, չի ստացվի։ Ուզում եմ վստահեցնել, որ մենք չենք շեղվելու մեր ճանապարհից և շարունակելու ենք հանրությանը ներկայացնել երկրի զարգացման մեր տեսլականը», – եզրափակեց Տոնոյանը՝ նշելով, որ նրանց թիմակիցների դեմ հարուցված քրեական գործերը ուղղված են եղել նախընտրական շրջանում կուսակցության գործունեությունը կաթվածահար անելու նպատակով։
