ՀՀ ՆԳՆ-ի բարեփոխումների շրջանակում կազմավորվում է ժամանակակից կիբեռլաբորատորիա, որի նպատակն է կիբեռհանցագործությունների դեմ պայքարի արդյունավետությունը բարձրացնելը և ոստիկանության տեխնիկական կարողությունները զարգացնելը։
ՀՀ-ում ԱՄՆ դեսպանության հետ համագործակցության շնորհիվ ՀՀ ՆԳՆ ոստիկանության քրեական ոստիկանության գլխավոր վարչության կիբեռհանցագործությունների դեմ պայքարի վարչությունը ստացել է ժամանակակից սարքավորումների և ծրագրային ապահովումների առաջին խմբաքանակը։
Ստացված տեխնիկական միջոցները նախատեսված են էլեկտրոնային տվյալների ուսումնասիրման, մշակման և վերլուծության համար։ Այս նորագույն գործիքակազմը կնպաստի վարչության կազմում ստեղծվող կիբեռլաբորատորիայի գործունեության ապահովմանը։
Նոր սարքավորումները կբարձրացնեն կիբեռհանցագործությունների բացահայտման և տեղեկատվական տեխնոլոգիաների կիրառմամբ իրականացվող այլ հանցատեսակների դեմ պայքարի արդյունավետությունը՝ նպաստելով հանրային անվտանգության ապահովման նոր մեխանիզմների ներդրմանը։
